Sparikrukkan – vika 35

bok-ofan-post

Kæru vinir,

Nú er vika 35 og við setjum 3.500 krónur í krukkuna góðu.
Nú eiga því að vera samtals 63.000 krónur í krukkunni.

Sparnaðarráð vikunnar er að skoða ruslið.

Ég á ekki við að gramsa í rusli og hirða eigulega hluti heldur að skoða hverju þú hendir af matvöru og annari vöru.

Ég hef staðið mig að því að henda „gömlum“ leikföngum, brotnum vaxlitum og öðru sem ég hef verðmetið sem rusl. Matur fer einnig sömu leið. Gamalt grænmeti, brúnir bananar, útrunnin skinka, myglað brauð og svo mætti lengi telja.

Samkvæmt nýlegri breskri rannsókn er talið að allt að 30 prósent matvöru fari í ruslið á hverju heimili og því gætu verið umtalsverðar upphæðir til að spara í ruslinu. Það er ekki nægjanlegt að horfa á verðmiðann ef þú ætlar að spara því ef matvöru er síendurtekið hent áður en hennar er neytt eða áður en hún klárast þá þarf að endurskoða hvað verið er að kaupa. Fyrsta skrefið er að spyrja sig í hvert sinn sem matur endar í ruslinu af hverju við erum að henda honum.  Algengustu svörin við þeirri spurningu eru að við borðum ekki þann mat sem við kaupum, hendum afgöngum eða við kaupum of mikið í einu. Einnig að við verslum óundirbúið af handahófi og við kaupum mat sem endist ekki þann tíma sem hann þarf að endast.

Einfaldar leiðir til að snúa vörn í sókn

  • útbúa matseðil fyrir vikuna og kaupa inn eftir honum.
  • Gera magninnkaup og nýta frystinn til að geyma brauð, mjólk, kjöt og fisk sem síðan er affryst daginn fyrir neyslu.
  • Áætla líftíma á mat og ekki kaupa of mikið af ferskum vörum eins og ávöxtum því þeir eiga að klárast á örfáum dögum.
  • Miðaðu magn við dagsetningar svo vörurnar klárist áður en þær renna út.
  • Frystu afganga því þeir gætu nýst sem skyndibiti beint í örbylgjuofninn eða sem nesti í vinnu eða skóla.

Ef þú skráir niður það sem hent er í ruslið gætir þú séð hvað þú kaupir of mikið af eða geymir of lengi. Nýttu þér það síðan næst þegar þú gerir innkaupalista. Matarinnkaup eru sá þáttur sem hvað auðveldast er að ná góðum sparnaði í og með því að fylgjast með neysluvenjum á þennan hátt gætu sparast töluverðar upphæðir á ári.

Þessi kafli um ruslið er úr vinnubókinni Betri Fjármál

bokhaskoalprent-ofan-post