Sparikrukkan 2017 – vika 51

bok-ofan-post

Kæru vinir,

nú er vika 51 og  við setjum 5.100 krónur í krukkuna góðu.
Nú eiga því að vera samtals 132.600 krónur í krukkunni.

Sparnaðarráð vikunnar er að skipuleggja alltaf innkaupin.

Innkaupalistar

Innkaupalistar eru mikilvægir þegar við endurskipuleggjum fjármálin því það eru litlu hlutirnir sem við kaupum daglega og vikulega sem hafa stærstu áhrifin á útgjöldin. Við erum alltaf að fara í matvörubúðina eða kaupa eldsneyti á bílinn. Margar vörur sem við verslum síendurtekið eru löngu orðnar hversdagslegar og ósýnilegar og líklega veitum við því ekki athygli hvað vörurnar kosta.

Þegar við skrifum innkaupalista erum við að ákveða fyrirfram hvert peningarnir eiga að fara. Skipulag í innkaupum getur sparað okkur 30% og sá sparnaður skilar sér um leið og þú byrjar. Gott er að venja sig alltaf á að nota innkaupalista. Margir hafa blað og penna á eldhúsborðinu eða á ísskápnum og skrifa á hann jafnóðum og tilteknar vörur klárast.

Skipulag í innkaupum getur sparað okkur 30%

13 góð ráð þegar við gerum innkaupalista

1. Sestu niður og ákveddu hvað á að versla, áður en þú ferð í búðina. Farðu í ísskápinn og skoðaðu hvað vantar. Veldu aðeins það sem vantar og spurðu þig hvort heimilið þurfi virkilega þessar vörur. Hvað má geyma eða sleppa alveg að versla?

2. Innkaupalistinn virkar þegar þú ferð að versla. Verslaðu aðeins það sem stendur á innkaupalistanum. Þannig hjálpar innkaupalistinn þér að versla ekki ónauðsynlegar vörur á staðnum.

3. Veldu verslun. Ekki fara í næstu tiltæku búð. Veldu ódýrustu verslunina sem þú treystir. Farðu í verslanir sem þú hefur aldrei verslað í og gerðu verðkannanir. Finndu „búðirnar þínar“. Margir versla pakkamat og geymsluvöru í einni verslun en ferskvöru í annarri.

4. Skiptu innkaupamiðanum niður á verslanir. T.d. með því að skoða tilboð allra verslana og merkja hvað á að kaupa í hverri verslun.

5. Farðu á þínum tíma. Að fara í búðir með hungur, þreytu og streitu meðferðis ýtir undir óskynsamleg kaup og þá viljum við gjarnan versla í flýti. Veldu þér þann dag og tíma sem hentar þér best til að versla í rólegheitum fyrir vikuna.

6. Börnin þurfa athygli. Leyfum börnunum að taka þátt með því að haka við vörur á innkaupalistanum, sækja vörur í hillur o.s.frv. Það getur verið ansi gaman að versla með mömmu og pabba. Aftur á móti ýta þreytt og pirruð börn undir óskynsamleg og óskipulögð kaup. Það er því gott og gaman að hafa einhvern með sem veitir „óþægum börnunum“ athygli á meðan þú verslar. Hægt er að rúnta um búðina og jafnvel fara í leiki: „Finndu ódýrasta klósettburstann“, „Finndu ljótasta kexpakkann“, „Teldu allar gular vörur sem þú sérð“ o.s.frv.

7. Gerðu verðsamanburð. Með innkaupalistanum getur þú í rólegheitum skoðað verð á vörum. Ekki endilega taka vörur með afslætti nema hafa skoðað fyrst verðin á sambærilegri vöru. Og skoðaðu verðmun á milli framleiðanda. Þekktur kjúklingaframleiðandi með 40% afslætti er stundum dýrari en óþekktur með engum afslætti. Bleyjur frá óþekktu vörumerki geta verið helmingi ódýrari en þekkt vörumerki.

8. Það er samkeppni á milli verslana. Fylgstu með tilboðum verslana. Geymslumat (dósir, þurrmatur), þvottaefni og klósettpappír má til dæmis gjarnan kaupa á góðum tilboðum.

9. Skoðaðu strimilinn. Til langs tíma má spara umtalsverðar fjárhæðir með því að skoða strimilinn. Því miður er oft munur, jafnvel mikill, á hilluverði og strimli.

10. Ekki kaupa tískuvörur, skartgripi, úr, raftæki, húsgögn o.s.frv. á fullu verði. Lágvöruverslanir og „outlet“-verslanir selja sömu vörur á langtum betra verði. Farðu nokkrar ferðir áður en þú ákveður þig. Skoðaðu B-vöruhornið, en þar má finna skilavörur seldar með verulegum afslætti.

11. Keyptu vörur á útsölum. 30, 40, 50, jafnvel 70% afsláttur er gefinn. Það þarf ekki að kaupa allar gjafirnar viku fyrir jól. Hægt er að gera góð kaup í jólagjöfum og leikföngum fyrir börn á útsölum eftir jól. Föt er hægt að kaupa á góðu verði þegar verslanir skipta út sumar- og vetrarvöru.

12. Notaðar vörur eru ekki endilega ónýtar. Til dæmis er Kolaportið eitt best geymda leyndarmál nískupúkans. Með því að gefa sér tíma má finna þar ótrúlegustu hluti, allt frá kartöflum upp í dýrindis gjafir. Geisladiska- og myndbandamarkaðir selja ónotaða gamla diska og myndir á góðum verði.

13. Ekkert verð – stundum vantar verð á vöru sem maður þarf að kaupa. Haltu henni til hliðar í körfunni og spurðu á kassa um verðið, þá geturðu hætt við ef varan er of dýr.

panta-bok-fritt